काठमाडौं । नेकपा माओवादी केन्द्रका केन्द्रीय सदस्य तथा हुम्लाबाट निर्वाचित सांसद छक्कबहादुर लामा नेकपा एमालेमा प्रवेश गरेका छन् ।

बालकोटमा एमाले अध्यक्ष केपी शर्मा ओली, उपमहासचिव प्रदीप ज्ञवालीलगायतका नेताले लामालाई खादा तथा टीका लगाएर पार्टीमा स्वागत गरेका हुन्।

उनीसहितको टिमलाई एमालेले प्रवेश गराएर टिकट दिन लागेको छ । २०७४ सालको आमनिर्वाचनमा स्वतन्त्र उम्मेदवार बनेर लामाले चुनाव जितेका थिए ।

लामाले एमालेमा आफ्नो प्रवेश राजनीतिको सेफ ल्यान्डिङ भएको बताएका छन् । २०७४ को सालमा माओवादी केन्द्रले हुम्लामा टिकट नदिएपछि विद्रोह गरेका लामाले सबैभन्दा कम ४७ मतान्तरले चुनाव जितेका थिए ।

नेकपाको विवादमा समेत उनी अध्यक्ष ओली समूहमा लागेका थिए । ओलीले महाधिवेशनमा आयोजक समितिका सदस्य बनेका लामापछि दाहाल र नेपाल समूहतर्फ लागेका थिए । उनले माओवादीसँग विचार नमिलेको बताए ।