काठमाडौं । नेकपा (एकीकृत समाजवादी)को प्रथम केन्द्रीय परिषद् बैठक आज सम्पन्न हुने भएको छ । बैठकमा पार्टी अध्यक्ष माधव कुमार नेपालले प्रस्तुत गरेको प्रतिवेदनमाथि छलफल तथा परिमार्जन सहित पारित हुनेछ ।

देशभरबाट करिब एक हजार ५०० सहभागी केन्द्रीय परिषद्मा छलफल भएपछि उक्त प्रतिवेदन परिमार्जनसहित आज पारित गरिन लागेको हो ।

यसअघि सोमवार बसेको बैठकमा अध्यक्ष नेपालको ३४ पृष्ठ लामो प्रतिवेदनलाई १२ बुँदामा प्रस्तुत गरिएको थियो । अध्यक्ष नेपालले प्रस्तुत गरेको प्रतिवेदनमा राष्ट्रिय तथा अन्तर्राष्ट्रिय परिस्थितिदेखि आगामी कार्य योजनासम्म समेटिएका छन् ।

प्रतिवेदनमा वर्तमान राजनीतिक शक्तिलाई ‘दक्षिणपन्थी अवसरवादी र वाम–लोकतान्त्रिक’ गरी दुई धारमा व्याख्या गरिएको छ। प्रतिवेदनमा वर्तमान वाम–लोकतान्त्रिक गठबन्धनको औचित्य र आवश्यकताबारे व्याख्या गरिएको छ ।