काठमाडौं । धनगढी जान लागेका प्रधानमन्त्री शेरबहादुर देउवा सवार हेलिकप्टर भैरहवाको गौतमबुद्ध अन्तर्राष्ट्रिय विमानस्थलमा अवतरण गरिएको छ ।

सुदूरपश्चिममा हुने कार्यक्रमका लागि धनगढी उडेको देउवा सवार हेलिकप्टर इन्धन भर्न भैरहवा विमानस्थलमा अवतरण गरेको हो ।

‘लङ रूट भएपछि हेलिकप्टर भैरहवा अवतरण गरी रिफ्युल गरिएको हो । उहाँ एयरपोर्टमै १५–२० मिनेट बस्नुभएको थियो,’ रूपन्देहीका प्रहरी प्रमुख रवीन्द्र रेग्मीले भने ।

देउवासँगै हेलिकप्टरमा शिक्षामन्त्री देवेन्द्र पौडेल पनि थिए । देउवा सुदूरपश्चिमाञ्चल विश्वविद्यालयको दीक्षान्त समारोहमा सहभागी हुन धनगढीतिर लागेका हुन् ।