काठमाडौं । नेपाल राष्ट्रिय विद्यापीठ उच्च माध्यमिक विद्यालय, श्रीपूर, मुर्ली, वीरगंज, पर्साका तत्कालीन प्रधानाध्यापक बलराम श्रेष्ठ सहित २ जनाविरुद्ध भ्रष्टाचार मुद्दा दर्ता गरिएको छ ।

अख्तियार दुरुपयोग अनुसन्धान आयोगले तत्कालीन प्रधानाध्यापक बलराम श्रेष्ठ र बिद्यालय कर्मचारी राकेशमान श्रेष्ठविरुद्ध विशेष अदालत, काठमाडौंमा भ्रष्टाचार मुद्दा दर्ता गरेको हो ।

बलराम श्रेष्ठले विज्ञान प्रयोगशाला निर्माण, सामाग्री व्यवस्थापन, भवन निर्माण र महिला शौचालय निर्माणका लागि निकासा भएको २९ लाख ५० हजार आफूखुसी खर्च गरेको र ९२ हजार दोहोरो तलब लिएको अख्तियारले जनाएको छ ।

श्रेष्ठलाई तीस लाख बयालीस हजार बिगो माग गरिएको छ ।

यस्तै लेखा सञ्चालक राकेशमान श्रेष्ठले एउटा शीर्षकमा बिनियोजित रकम सम्वन्धित शीर्षकमा खर्च नगरी आफूखुशी खर्च गरेको भन्दै २९ लाख पचास हजार बिगो माग गरि मुद्दा दर्ता गरिएको हो ।