बिर्तामोड । नेकपा एमालेका अध्यक्ष केपी शर्मा ओलीले सबै दल मिलेर एमालेलाई घेराबन्दीमा पार्न खोजे पनि त्यसले कुनै असर नगर्ने बताएका छन् ।

दमक नगरपालिकामा एमालेविरुद्धको गठबन्धन स्यालले हात्तीको खुट्टा चिथोर्नु जस्तो मात्र भएको टिप्पणी गर्दै उनले दमकवासीले पार्टीभन्दा नेता हेरेर भोट दिने विश्वास व्यक्त गरे ।

गृहनगर दमकमा मंगलबार आयोजित चुनावी सभालाई सम्बोधन गर्दै ओलीले दमकमा भएको विकास निर्माणको विरोध गर्ने दलहरु गठबन्धनमा बाँधिएकाले एमालेलाई कुनै फरक नपर्ने दावी गरे ।

ओलीले सत्तारुढ पाँच दल मिल्दा पनि दमकमा एमालेलाई हराउने आँट गर्न नसकेको बताए । उनले भने–‘दमक एमालेको गढ हो, किल्ला हो । त्यसैले पाँच दल मिल्दा पनि एमालेविरुद्ध लड्ने हिम्मत गरेनन् र राप्रपासँग मिल्न बाध्य भए ।’

उनले भने–‘दमकमा बन्दै गरेको भ्यूटावर देखेर तर्सिएकाहरु, सभागृह बनेको देख्न नसकेकाहरुले एमालेको सरकारको विरोध गर्ने हो । आफ्नै गाउँ, आफ्नै ठाउँमा भएको विकासको पनि विरोध गर्ने कस्ता नेता ?, कस्तो राजनीति ? त्यसैले विकास विरोधलाई होइन । तपाईंहरुले विकासप्रेमी नेता हेरेर भोट दिनुहोस् ।’