एजेन्सी । रुसी फौजले पश्चिमी युक्रेनी सहर लभिभमा आक्रमण लक्षित गर्न थालेको छ । आइतबार त्यहाँ अत्याधुनिक क्रुज क्षेप्यास्त्र प्रहार गरिएको रुसी रक्षा मन्त्रालय पुष्टि गरेको हो ।

रुसी फौजले लभिभनजिक युक्रेनी फौजले प्रयोग गरिरहेको इन्धन भन्डारमा लामो दूरीका क्षेप्यास्त्र प्रहार गरेको छ ।

यसैगरी, विमानभेदक प्रणाली, रडार स्टेसन्स र टैंकको दृष्टि मर्मत गर्न प्रयोग भइरहेको कारखानामा क्रुज क्षेप्यास्त्र प्रहार गरिएको रक्षा मन्त्रालयले पुष्टि गरेको हो ।

मन्त्रालयका प्रवक्ता इगोर कोनासेनकोभले रुसी महासंघको सशस्त्र फौजले विशेष सैनिक अभियानानुसार आक्रमण कार्यलाई जारी राखेको बताएका छन् ।

रक्षा मन्त्रालयले लभिभ सहरमा क्षेप्यास्त्र प्रहार हुँदै गरेका भिडियो पनि सार्वजनिक गरेको छ ।