काठमाडौँ । महानगरीय अपराध महाशाखाले रातको समयमा मोबाइल पसल फुटाई चोरी कार्यमा संलग्न दुई युवालाई पक्राउ गरेको छ।

पक्राउ पर्नेहरुमा गोरखा गण्डकी नगरपालिका-५ घर भइ काठमाडौँ बूढानीलकण्ठ बस्ने २४ बर्षीय सुरेश गिरि र बाँके जिल्ला नेपालगंज उपमहानगरपालिका-५ घर भइ बूढानीलकण्ठनै बस्ने २२ बर्षीय गणेश क्षेत्री रहेका छन्।

महाशाखाका अनुसार गएराती काठमाडौँ महानगरपालिका-४ बिशालनगरस्थित सुरज ईलोक्ट्रिनिक्स मोवाइल पसलबाट उनीहरुलाई चोरी गरेर भाग्दै गर्दा पक्राउ गरिएको हो।

उनीहरुको साथबाट बिभिन्न कम्पनीका सिलप्याक मोवाईल ३७ थान, मर्मतका लागी राखिएका मोवाईल १५ थान, गितार १ थान तथा स्मार्ट घडी २५ थान समेत बरामद गरिएको महाशाखाको भनाइ छ।

पक्राउ परेका उनीहरुलाई थप कानुनी कारबाहीको लागि महानगरीय प्रहरी वृत्त, महाराजगन्ज पठाइएको महाशाखाले जनाएको छ।