एजेन्सी । युक्रेनमा रुसी सेनाको आक्रमणमा परेर हालसम्म १९८ जना युक्रेनीको मृत्यु भएको छ । कम्तीमा १९८ जना युक्रेनीको मृत्यु भएको युक्रेनका स्वास्थ्य मन्त्री भिक्टर ल्यास्कोले जानकारी दिए ।

सामाजिक सञ्जाल फेसबुक मार्फत उनले दिएको जानकारी अनुसार मृतकको संख्या अझ धेरै हुन सक्ने सम्भावना छ । मारिएका मध्ये तीन जना बालबालिका पनि रहेको बताइएको छ । पछिल्लो तीन दिनदेखिको भिडन्तका क्रममा १ हजार ११५ जना घाइते भएका छन् । यस्तै रुसले युक्रेनमा आक्रमणलाई आज पनि निरन्तरता दिएको छ ।

रुसको आक्रमण पछि त्रसित भएका युक्रेनका नागरिकले राजधानी किभ छोड्ने क्रम चलिरहेको छ । पछिल्लो ४८ घण्टामा युक्रेनबाट एक लाख २० हजार जनाभन्दा धेरै बाहिरिएका संयुक्त राष्ट्र सङ्घले जनाएको छ । रुसी सेना राजधानी किएभमा नै प्रवेश गरेकाले त्यहाँ रहेकाहरु छिमेकी देशमा शरण लिन पुग्न थालेका छन् ।

यसबीचमा जर्मनी र फ्रान्सले युक्रेनलाई थप हतियार दिने घोषणा गरेका छन् । किएभमा आज मिसाइल आक्रमण हुन सक्ने आशङ्का गरिएको छ । किएभका मेयरले त्यहाँ रहेका नागरिकलाई भोलि बिहानसम्म घरभित्रै बस्न आदेश दिएका छन् । रुसी सेना प्रवेश गरेकाले भोलि बिहानसम्मका लागि किएभमा कर्फ्यु लगाइएको हो ।