काठमाडौँ । नेकपा एमाले संसदीय दलको बैठक सुरु भएको छ । प्रधानन्यायाधीश चोलेन्द्र शमशेर जबराविरुद्ध महाअभियोग दर्ता भएपछि एमालेले संसदीय दलको बैठक आह्वान गरेको थियो । बैठक केही बेरअघि बानेश्वरस्थित संसद् भवनको ल्होत्से हलमा सुरु भएको हो।

बैठकमा एमालेले प्रधानन्यायाधीश जबराविरुद्धको महाभियोग प्रस्तावलाई काउन्टर दिने तयारी गरेको छ । यसअघि आइतबार बसेको एमाले सचिवालय बैठकले सर्वोच्च अदालतका चार न्यायाधीशविरुद्ध महाभियोग लगाएर काउन्टर दिने तयारी गरेको थियो ।

अर्को पनि पढ्नैपर्ने

एमालेले सर्वोच्च अदालतका चार न्यायाधीशलाई महाअभियोग लगाउने

अहिलेको बैठकमा पनि हिजैको एजेण्डामाथि छलफल हुने स्रोतको भनाइ छ । तत्कालीन प्रधानमन्त्री केपी शर्मा ओलीले प्रतिनिधिसभा विघटन गरेपछि सो कदमविरुद्ध मुद्दा परेको थियो । सो मुद्दामा प्रधानन्यायाधीश जबरासहित न्यायाधीशहरू दीपककुमार कार्की, ईश्वर खतिवडा, आनन्दमोहन भट्टराई र मीरा खड्काको इजलासले परमादेश जारी गरी प्रतिनिधिसभा ब्युँताइदिएको थियो ।

‘सचिवालय बैठकमा महाभियोग लगाउने प्रस्तावबारे छलफल भएको छ, निर्णय भने भएको छैन,’ सचिवालय स्रोतले भन्यो । स्रोतका अनुसार अहिले बसिरहेको बैठकमा सांसदहरूको समेत राय लिएर निर्णय गरिने बताइएको छ।

अर्को पनि पढ्नैपर्ने

जबराविरुद्धको महाअभियोग न्यायपालिकाविरुद्धको षडयन्त्रपूर्ण कदम भएको एमालेको निष्कर्ष

सचिवालय बैठकमा अध्यक्ष ओलीले एमालेमाथि गम्भीर षड्यन्त्र भएको र यसले लोकतन्त्रलाई नै कमजोर बनाउने भएकाले चार न्यायाधीशलाई महाभियोग लगाउनुपर्ने बताएका थिए।  सत्ता गठबन्धनका सांसदहरुले हिजो प्रधानन्यायाधीश जबराविरुद्ध महाअभियोग प्रस्ताव दर्ता गरेका थिए ।

अर्को पनि पढ्नैपर्ने

सभामुखले बोलाएको सर्वदलीय बैठकमा एमाले नजाने