रौतहट । जनता समाजवादी पार्टीकी नेतृ एवं संघीय सरकारकी भौतिक पूर्वाधार तथा यातायातमन्त्री रेणु यादवले जनमत पार्टीका अध्यक्ष डा सीके राउतलाई ज्यान मार्ने धम्की दिएकी छन् ।

बिहीबार बलिदानी दिवस मनाउन गौर आएकी मन्त्री यादवलाई राउत नेतृत्वको जनमतका कार्यकर्ताले अवरोध गर्न खोजेका थिए । अवरोध छिचोल्दै कार्यक्रममा पुगेकी उनले राइस मिल घटना दोहोरिन सक्ने भन्दै आफूहरुसँग टकराए मारिने सक्ने धम्की दिएकी हुन्।

विसं ७ चैत २०६३ मा राइसमिलमा तत्कालीन मधेसी जनअधिकार फोरम र माओवादीले छुट्टैछुट्टै कार्यक्रम राखेका थिए । त्यसक्रममा भएको हिंसात्मक घटनामा तत्कालीन नेकपा माओवादीका २८ कार्यकर्ताको हत्या भएको थियो ।

सम्बोधनमा उनले भनिन् ‘तुफानसँग टकराउने प्रयास गर्यो भने तपाईको त्यही हालत हुन्छ जुन गौरको राइस मिलमा भएको थियो । म डाक्टर साब (सिके राउत) लाई भन्छु, त्यो इतिहास नभुलुन् । नत्र तपाईंका कार्यकर्ता मारिन्छन्, सतर्क रहनुस् ।’