Jun 07 2026 | २०८३, जेठ २४ गते
07 Jun 2026 | आइतवार, जेठ २४ गते २०८३
आइतवार, जेठ २४ गते २०८३
Jun 07 2026 | २०८३, जेठ २४ गते
07 Jun 2026 | आइतवार, जेठ २४ गते २०८३
![बंगलादेशमा डुङ्गा आगलागी: कम्तीमा ४० जनाको मृत्यु, १०० भन्दा बढी घाइते [अपडेट]](https://media.sobizcdn.com/onlinenepal.com/media-file/images/2021/12/122502028_bangladesh_ferry_fire.jpg.webp)
एजेन्सी । बङ्ग्लादेशमा एउटा यात्रुवाहक डुङ्गामा आगलागी हुँदा कम्तीमा ४० जनाको ज्यान गएको अधिकारीहरूले बताएका छन् । उक्त घटनामा परेर झन्डै १०० जना घाइते भएका छन्।
त्यहाँको सुगन्धा नदीमा उक्त घटना भएको हो। घटना भएको झालोकाटी जिल्लाका अतिरिक्त प्रहरी उपरीक्षक मोइनुल हकले घटनास्थलमा दर्जनौँ शव फेला पारिएको बताएको बीबीसी बाङ्ग्लाले उल्लेख गरेको छ।
डुङ्गामा आगो लाग्दा कैयौँ यात्री नदीमा हाम फालेको अधिकारीहरूले बताएका छन्।
मृतकको सङ्ख्या बढ्न सक्ने ठानिएको छ। धेरैजसोको मृत्यु आगोले जलेर भएको छ भने केही आगलागी भयो भनेर पानीमा हाम फाल्दा डुबेर मरेका छन्।"
डुङ्गामा ५०० जना यात्रु रहेको बताइएको छ। एमभी अभियान नामक डुङ्गा राति ढाकाबाट बर्गुनाका लागि रमाना भएको थियो।
शुक्रवार सबेरै उक्त डुङ्गामा आगलागी सुरु भएको थियो। आगलागीको कारण स्पष्ट हुन सकेको छैन।
घाइतेहरूलाई बरिसल सदर अस्पताल र स्थानीय अस्पतालमा लगिएको बताइएको छ। झालकाठीका स्थानीय पत्रकार आकाश सिक्दरले बीबीसी बाङ्ग्लालाई बताए अनुसार उनले बिहान ३:३० बजे आगलागीको समाचार पाएका थिए।
उनले कैयौँ मानिसहरू ज्यान जोगाउन डुङ्गाबाट पानीमा हाम फालेको बताए। यात्रुहरूलाई उद्धृत गर्दै पत्रकार सिक्दरले भनेः ढाकाबाट उक्त डुङ्गा रमाना भएका बखत नै सामान्यभन्दा धेरै तातो थियो। यात्रुहरूले गुनासो गरेपछि डुङ्गा कर्मचारीले कार्पेट ओछ्याइदिएका थिए। तर तातोपन बढ्दै गयो।
बाँच्न सफल एक वृद्धाले समाचारसंस्था एएफपीलाई आगलागी भएको बेला धेरैजसो मानिस सुतिरहेका बताइन्। 'सबभन्दा तल्लो तलाको भुईँमा हामी सुतिरहेका थियौँ, मसँग मेरो नौ वर्षको नाति नायीम पनि थियो। ऊ नदीमा हाम फाल्यो उसलाई के भयो मलाई थाहा छैन।'
रिपोर्टहरूमा जनाइएअनुसार दुर्घटनाको अनुसन्धान गर्न विशेष समिति गठन गरिएको छ। बर्गुना ढाकाबाट २५० किलोमिटर दक्षिणमा पर्छ।
बङ्ग्लादेशमा बारम्बार डुङ्गाको सुरक्षा स्थिति राम्रोसँग जाँच नगरिनु, सुरक्षा मापदण्डको अभाव र क्षमताभन्दा बढी यात्रु बोक्नुका कारण हुने गरेको बताइन्छ। गत जुन महिनामा पनि ५० जना यात्रु बोकेको डुङ्गा डुब्दा दर्जनौँ मानिस मारिएका थिए। बीबीसीको सहयोगमा
© 2026 All right reserved to onlinenepal.com
Design & Developed By
