काठमाडौं । नेपाली कांग्रेसका सभापति शेरबहादुर देउवाले पार्टीका ३ जना नेताहरुलाई पार्टी केन्द्रीय सदस्यमा मनोनित गर्ने भएका छन् ।

स्रोतका अनुसार देउवाले आज (शनिबार) नेतात्रय रामचन्द्र पौडेल, कृष्णप्रसाद सिटौला र प्रकाशमान सिंहलाई केन्द्रीय सदस्य मनोनित गर्न लागेका हुन्।

कांग्रेसको नवनिर्वाचित केन्द्रीय समितिको बैठक आज दिउँसो १ बजे बस्दैछ । केन्द्रीय समितिको पहिलो बैठक बस्नु अगाडि सभापति देउवाले ३ जना नेतालाई केन्द्रीय सदस्य मनोनित गर्न लागेको स्रोतको भनाइ छ।

कांग्रेस विधानमा केन्द्रीय सभापतिले ३३ सदस्य मनोनित गर्ने व्यवस्था उल्लेख छ ।

यस्तै, आजको पहिलो केन्द्रीय कार्यसमितिको बैठकमा प्रधानमन्त्री एवं पार्टी सभापति देउवाले सबैलाई धन्यवाद दिने, स्वागत गर्ने, निर्वाचन आयोगमा दल दर्ताका लागि निर्णय गर्नेलगायतको कार्यसूची रहेको बताइएको छ ।