काठमाडौं । नेपाली कांग्रेसले प्रदेश महाधिवेशन गराउनका लागि सात जना केन्द्रीय नेताहरुलाई जिम्मा दिएको छ ।

आइतबार सभापति शेरबहादुर देउवाको निवास बूढानीलकण्ठमा बसेको पार्टी पदाधिकारीको बैठकले प्रदेश महाधिवेशनका लागि ७ जना नेताहरुलाई जिम्मा दिने प्रस्ताव प्रस्तुत गरेको हो।

जसअनुसार प्रदेश १ मा कृष्णप्रसाद सिटौला, प्रदेश २ मा रमेश रिजाल, वागमतीमा प्रकाशमान सिंह, गण्डकीमा गोपालमान श्रेष्ठ, लुम्बिनीमा बालकृष्ण खाँण, कर्णालीमा जीवनबहादुर शाही र सुदूरपश्चिममा दिलेन्द्रप्रसाद बडुले प्रदेश महाधिवेशन संयोजन गर्ने जिम्मा पाएको बूढानीलकण्ठ स्रोतले बताएको छ।

यस्तै,बैठकले पार्टीको केन्द्रीय महाधिवेशनका लागि केन्द्रीय सदस्य सुरेन्द्र पाण्डेको संयोजकत्वमा आवास तथा भोजन समिति गठन गरेको छ ।

पार्टीका अनुसार प्रदेश अधिवेशन मंसिर १६ र १७ गते तोकिएको छ ।