काठमाडौँ । नेकपा (एकीकृत समाजवादी)को सांसद कायम गर्न माग गर्दै नेकपा (एमाले)का दुई सांसद (सोमप्रसाद पाण्डे र शारदादेवी भट्ट)को रिटमा मुद्दा नटुंगिएसम्म कारबाही नगर्न सर्वोच्च अदालतले अन्तरिम आदेश जारी गरेको छ।

मंगलबार न्यायाधीश ईश्वर खतिवडा र नहकुल सुवेदीको संयुक्त इजलासले दलमा आवद्ध हुन पाउने हकमा असर पर्नेगरि कुनै कारबाही नगर्न एमालेलगायत विपक्षीका नाममा अन्तरिम आदेश जारी गरेको हो ।

अर्को पनि पढ्नैपर्ने

नेकपा समाजवादीमा जान पाउँ भन्ने दुई एमाले सांसदको मुद्धामा सुनुवाइ हुँदै

प्रतिनिधिसभा सांसद पाण्डे र राष्ट्रिय सभाकी सदस्य भट्टले निर्वाचन आयोगले आफूले रोजेको नेकपा एसको पक्षमा सनाखत नगरेको भनी रिट दायर गरेका थिए। रिटमा निर्धारित समयमा एकीकृत समाजवादी रोजे पनि निर्वाचन आयोगले सनाखत नगरिदिएको जिकिर गर्दै एमालेले गर्न सक्ने कारबाही रोक्न अन्तरिम आदेश माग गरिएको  थियो।

अदालतको उक्त आदेशपछि अब उनीहरूले नयाँ पार्टी रोजेमा सांसद पद जाने छैन । यस्तै एमालेले कारबाही समेत गर्न पाउने छैन।