काठमाडौँ । अख्तियार दुरुपयोग अनुसन्धान आयोगले पेट्रोल पम्प घोटालामा प्रहरी सहायक निरीक्षक (असई) दिलिप कार्कीविरुद्ध १ करोड बढी भष्ट्राचारको मुद्दा दायर गरेको छ।

आइतबार अख्तियारले प्रहरी कल्याण कोषद्वारा संचालित पेट्रोलपम्प, नक्सालमा कार्यरत असई कार्कीविरुद्द विशेष अदालत काठमाडौँमा १ करोड बढी भष्ट्राचारको मुद्दा दायर गरेको हो।

असई कार्कीविरुद्द उनी पम्पमा कार्यरत रहँदा केही व्यक्तिले भुक्तानी गरेको रकमलाई गलत प्रविष्ट गरेर हुँदै नभएको कारोवारको आधारमा असूली देखाएर रकम हिनामिना गरेको उजुरीमाथि अनुसन्धान हुँदा उनी दोषी देखिएका थिए।

अख्तियारको अनुसन्धानका क्रममा  कार्कीले बिक्री भएको तेलको वास्तविक रकम उल्लेख नगरी एक करोड ३ लाख ९७ हजार ९३७ रुपैयाँ हिनामिना गरेको पुष्टि भएको थियो ।

कार्कीको उक्त कार्य भ्रष्टाचार निवारण ऐन, २०५९ को दफा १७ बमोजिमको कसुरजन्य कार्य भएकोले उनलाई सोही दफाको प्रावधानबमोजिम भ्रष्टाचार निवारण ऐन, २०५९ को दफा ३ को उपदफा (१) र सोही दफाको उपदफा (१) को खण्ड (झ) बमोजिमको सजाय माग  गरिएको अख्तियारले जनाएको छ।