काठमाडौँ । भोलिदेखि लामो दुरीका सार्वजनिक गाडी जोर बिजोर प्रणालीमा चलाउन दिने तयारी भएको छ ।

यसबारे आज स्वास्थ्य मन्त्रालयसहित काठमाण्डौ उपत्यकाका तीनै जिल्ला प्रशासन कार्यालयका प्रमुख र सम्बन्धित अन्य निकायको बैठक बस्दैछ ।

लामो दुरीका गाडी नचल्दा नागरिकले दुःख पाएको भन्दै जोर बिजोर प्रणालीमा भए पनि सार्वजनिक गाडी चलाउन दिने तयारी भएको ललितपुरका प्रमुख जिल्ला अधिकारी ढुण्डीप्रसाद निरौलाले बताए ।

यात्रुले अत्यधिक भाडा तिर्नु परेको गुनासो बढेपछि जोर बिजोर प्रणालीमा लामो दुरीका गाडी चलाउने तयारी थालिएको हो । यसबारे आज साँझसम्ममा निर्णय हुने बताइएको छ ।

कोरोना सङ्क्रमणको जोखिम कायम रहेकाले साउन १ गतेदेखि कडा निषेधाज्ञा हुने हल्ला फैलिएको छ । काठमाण्डौ उपत्यकामा निषेधाज्ञालाई निरन्तरता दिने तयारी भएको छ ।

अहिलेको जस्तै खुकुलो बनाएर केही दिन निषेधाज्ञालाई लम्ब्याउने तयारी गरिएको हो । पछिल्लो पटक थप गरिएको निषेधाज्ञाको अवधि आज राति सकिँदैछ ।