काठमाडौं । नेकपा कम्युनिष्ट पार्टी (नेकपा) एमाले अध्यक्ष केपी शर्मा ओली र वरिष्ठ नेता माधवकुमार नेपालबीचको भेटवार्तामा सँगै रहेका नेता विष्णु पौडेल बाहिरिएका छन् ।

नक्साल नागपोखरीस्थित म्यारियट होटलमा जारी भेटमा नेता पौडेल पाँच मिनेट बसेर बाहिरिएका हुन् ।

पौडेल बहिरिएपछि अध्यक्ष ओली र नेपालबीच वान टु वन वार्ता जारि छ।

आजै दिउँसो नेपाल पक्षका नेता योगेश भट्टराईले पनि अध्यक्ष ओलीसंग भेटवार्ता गरेर पार्टी एकीकरणका लागि पहल गर्न आग्रह गरेसँगै ओली र नेपालबीच वार्ता सुरु भएको हो।

त्यस्तै, यसअघि आज दिउँसो अध्यक्ष ओलीको निर्णय पार्टी विधान र कानुन विपरित भएको भन्दै नेपाल पक्षका नेताहरुले ओलीविरूद्ध सर्वोच्च अदालतमा रिट पेश गरेका थिए।

तर उनीहरूको रिट आज पेश भए पनि दर्ता भइसकेको भने छैन ।

३२ जना नेता कार्यकर्ता र प्रतिनिधिसभा सदस्यहरूलाई गर्न लागिएको कारबाहीलाई रोक्न आदेश दिन माग गर्दै उनीहरू फागुन २८ र त्यसयता अध्यक्ष ओलीले गरेका निर्णय कार्यान्वयन रोक्न र गैरकानुनी कारबाही’को बाटो बन्द गर्न माग गर्दै सर्वोच्च पुगेको रिटमा उलेख गरिएको छ।