सुर्खेत । दैलेख जिल्लाको आठबिस नगरपालिकामा बस दुर्घटना हुँदा दुईजनाको मृत्यु भएको छ । दुर्घटनामा १६ जना घाइते भएका छन् ।

बिहीबार बिहान कर्णाली राजमार्गअन्तर्गत कालीकोटबाट सुर्खेतर्फ आउँदै गरेको कर्णाली प्रदेश–०२–००१ ख ०२४७ नम्बरको बस अनियन्त्रित भई सडकबाट करिब सय मिटर तल खसेर दुर्घटना भएको जिल्ला प्रहरी कार्यालय दैलेखका प्रहरी नायब उपरीक्षक अनुप श्रेष्ठले जानकारी दिएका छन् ।

बसमा सवार १८ जनामध्ये एकजनाको घटनास्थलमै र अर्का एकजनाको उपचारको क्रममा अस्पतालमा मृत्यु भएको हो । मृत्यु हुनेमा कालिकोटका
जितेन्द्रबहादुर शाही र कमल विक रहेका छन् ।

दुर्घटनामा परी घाइते भएकामध्ये ७ जनाको अवस्था गम्भीर रहेको छ । घाइतेहरुलाई थप उपचारका लागि दैलेख जिल्ला अस्पतालमा पठाइएको श्रेष्ठले बताए ।

उक्त दुर्घटनाका विषयमा थप अनुसन्धान भइरहेको श्रेष्ठले बताए ।