काठमाडौं । झण्डै तीन दशकदेखिको आशाको विषय बनेको बहुप्रतीक्षित मेलम्ची खानेपानी आयोजनाको पानी आज सुन्दरीजल आइपुग्ने भएको छ ।

फागुन १० गते परीक्षणका लागि सुरुङमा हालिएको पानी आज सुनदरीजल आइपुग्ने भएको आयोजनाले जनाएको छ ।

आयोजनाले सुन्दरीजलमा दुईवटा पानी प्रशोधन केन्द्र बनाएको छ । सुरुङबाट सामान्य अवस्थामै पानी आइपुगे यी दुई प्रशोधन केन्द्रमा पानी खसालेर वितरण प्रणालीमा जोडिने छ ।

यद्यपी अहिले नै भने वितरण प्रणालीमा जोडिने छैन । अझै पनि पाईप विच्छ्याउने काम सकिएको छैन ।

सुरुङबाट आएको पानी सुरुमा बागमतीमा फालिने छ । सुरुङभित्रको फोहोरसहित पानी आउने भएकोले सुरुको पानी बागमतीमा फाल्न लागिएको हो ।

पानी सुन्दरीजल आउने भएपछि प्रधानमन्त्री केपी शर्मा ओली अवलोकन तथा अनुगमनका लागि त्यहाँ पुग्ने कार्यक्रमसमेत रहेको छ । आज अपराह्न ४ बजे प्रधानमन्त्री सुन्दरीजल जाने कार्यक्रम तय भएको छ ।

यो आयोजनाबाट दैनिक १७ करोड लिटर पानी काठमाडौं उपत्यकामा आउने छ । उपत्यकामा हाल दैनिक ४३ करोड लिटर पानीको माग छ ।

तर काठमाडौं उपत्यका खानेपानी लिमिटेड (केयूकेएल) बाट दैनिक ८ करोड लिटर पानीमात्रै वितरण हुँदै आएको छ ।