काठमाडौं । कोरोनाभाइरस सम्बन्धी नियम ताेडेकाे आराेपमा पूर्व मिस इङल्याण्ड जारा हल्याण्ड पक्राउ परेकी छिन् ।

डेलीमेलको समाचारअनुसार जारा आफू कोरोनाभाइरस संक्रमित भएको पुष्टि भइसकेपछि पनि आफ्ना ब्वाइफ्रेण्डको साथमा विमान चढेर बारबाडोसबाट भाग्ने प्रयासमा थिइन् ।

२५ वर्षकी जारा र उनका ३० वर्षका ब्वाइफ्रेण्ड एलियट लभलाई ग्रयान्टली इन्टरनेशनल एयरपोर्टबाट पक्राउ गरिएको हो ।

विमान चढेर भाग्न लागेकी जारामाथि कोरोनाभाइरस सम्बन्धी नियम तोडेको आरोपमा मुद्दा समेत चलाइएको छ ।

जारामाथि यो अपराधको लागि १८ हजार पाउण्ड जरिवाना लगाइन सक्छ । साथमा उनलाई एक वर्षको जेल सजाय पनि हुन सक्छ ।

जारालाई बुधबार अदालतमा पेश गरिँदैछ । रिपोर्टअनुसार यो जोडी गत हप्ता मात्र भर्जिन एटलान्टिक एयरलाइन्सको उडानबाट बारबाडोस गएका थिए ।

उनीहरुलाई क्राइस्ट चर्च होटलमा क्वारेन्टाइनमा राखिएको थियो ।