काठमाडौं । नेपनली कांग्रेसकाे केन्द्रीय समिति बैठकमा सभापति शेरबहादुर देउवा र बरिष्ठ नेता रामचन्द्र पौडेलबीच चर्काचर्की परेको छ ।

कांग्रेस मुख्यालय सानेपामा बुधबार बसेकाे कार्यसमिति बैठकमा सभापति देउवा र बरिष्ठ नेता पौडेलबीच केहीबेर चर्काचर्की परेको एक केन्द्रीय सदस्यले जानकारी दिनए ।

ती केन्द्रीय सदस्यका अनुसार प्रधानमन्त्री केपी शर्मा ओलीले संसद विघटन गरेपछिकाे उत्पन्न अवस्थाकाे कदमविरुद्ध कांग्रेस आन्दोलनमा जाने कि नजाने भन्ने विषयमा दुई नेताबीच चर्काचर्की परेको हाे ।

केन्द्रीय समिति बैठक लम्बिने देखिएपछि पौडेलले बुधबार नै आन्दोलनका कार्यक्रम घोषणा गर्नु पर्ने बताएका थिए । तर, सभापति देउवाले बारम्बार नेकपा फुटिनसकेको भन्दै विरोधका कार्यक्रम घोषणा गर्न इन्कार गरे । देउवाले निर्वाचन आयोगले नेकपाका दुई पक्षको चुनाव चिन्हको निर्णय नगर्दासम्म पार्टीले विरोधको कार्यक्रममा जान नहुने बताएपछि पौडेल जंगिएका थिए ।

‘पार्टी कहिले फुट्छ ? निर्वाचन आयोगको निर्णय कहिले आउँछ भनेर कांग्रेस कुरेर बस्ने ? त्यतिञ्जेल सुतेर बस्ने ?’ भन्दै पौडेल सभापति देउवाप्रति आक्रमक बनेपछि सहमहामन्त्री प्रकाशरण महत र अर्का केन्द्रीय सदस्य शंकर भण्डारीले बसिरहेका ठाउँबाट उठ्दै सभापतिलाई बोल्न दिनुपर्ने भन्दै बचाउ गरेका थिए । केन्द्रीय सदस्य गुरु घिमिरेले पौडेलले सही कुरा गरेको भन्दै उनको बचाउ गरेका थिए ।

देउवाले प्रधानमन्त्री ओलीसँग सम्झौता गरेको र पार्टीलाई आन्दोलनमा लैजानबाट रोक्नका लागि सभापति देउवाले पार्टीको बैठकसमेत लम्बाउन चाहेको पौडेल पक्षको आरोप छ । त्यही बुझेर नै पौडेलले बुधबार तत्काल विरोधका कार्यक्रम घोषणा गर्न माग गरेका थिए ।