इलाम । जिल्ला प्रहरी कार्यालय इलामले पाँच जना फरार अभियुक्तलाई पक्राउ गरेको छ ।

पक्राउ गरिएकामध्ये २ जना सामूहिक बलात्कार मुद्दाका छन् । उनीहरु चुलाचुली गाउँपालिका घर भएका ३० वर्षीय मिलन राई उर्फ अनिश र ३१ वर्षीय जित कुमार राई रहेकाे प्रहरीले जनाएकाे छ ।

२०६४ मा झापा साधुहोली जंगलमा महिलालाई सामूहिक बलात्कार गरेका मिलन र जित कुमारलाई २०६७ मा अदालतले ११ बर्ष १ महिना कैद हुने फैसला गरेको थियो । घटनामा संलग्न अर्का एकजना अझै फरार छन् ।

सामूहिक बलात्कारमा संलग्न दुई जनासहित ५ फरार अभियुक्तलाई पक्राउ गरेर अदालतको आदेशले थुनामा पठाइएको जिल्ला प्रहरी कार्यालय इलामका एसपी नवीनराज राईले बताए । पक्राउ पर्नेमा सुर्योदय नगरपालिका घर भएका सन्तोष बस्नेत, हर्कबहादुर लिम्बु र माइजोगमाई गाउँपालिका घर भएका विष्णु कुमार राई छन् ।

३२ वर्षीय सन्तोष ठगी मुद्दाका फरार प्रतिवादी हुन् । उनलाई अदालतले २ बर्ष कैद र २० हजार जरिवाना हुने फैसला गरेको छ । कर्तव्य ज्यान मुद्दामा माइजोगमाई गाउँपालिका–२ घर भएका विष्णु कुमार राईलाई अदालतले ५ महिना ६ दिन कैद सजाय हुने फैसला गरेको छ ।

त्यस्तै, हातहतियार खरखजना मुद्दाका फरार सुर्योदय नगरपालिकाका ४४ वर्षीय हर्क बहादुर लिम्बुलाई ३ महिना कैद र ५ हजार जरिवाना हुने फैसला गरेको छ ।