काठमाडाैं । स्वास्थ्य तथा जनसंख्या मन्त्रालयले दैनिक २५ हजार जनाको पीसीआर विधिबाट परीक्षण गर्न सकिने जनाएको छ । नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले दैनिक २२ देखि २५ हजार जनाको पीसीआर परीक्षण गर्ने क्षमता रहेको जानकारी गराएका छन् ।

विभिन्न विधिबाट परीक्षण गर्ने ढोका खुलेको भन्दै उनले भने, ‘जीन एक्पर्टबाट पनि परीक्षण भइरहेको छ । साथै एन्टिजेन परीक्षण गर्नलाई त्यसको गुणस्तर प्रत्याभूति गर्ने काम भइरहेको छ।’ सरकारले एन्टिजेन परीक्षण गर्ने तयारी गरिरहेका बेला विज्ञहरूले भने उक्त परीक्षण विश्वसनीय नभएको भन्दै परीक्षण नगर्न सुझाएका छन् ।

मन्त्रालयले भने जापानबाट ६० हजार एन्टिजेन किट आउन लागेको भन्दै छिट्टै उक्त विधिबाट परीक्षण गरिने जनाएको छ।अहिले दैनिक औसत १० हजार जनाको पीसीआर परीक्षण हुँदै आएको छ ।