काठमाडौं । सरकारले वीर अस्पताललाई कोभिड विशेष अस्पताल बनाउने तयारी गरेको छ। कोरोना संक्रमितको संख्या बढ्दै गएपछि वीर अस्पताललाई कोभिड विशेष अस्पताल बनाउने तयारी भएको हो ।

स्वास्थ्य तथा जनसंख्या मन्त्रालयले कोभिड अस्पताल बनाउनका लागि निर्देशन दिएकाले तयारी अघि बढाइएको अस्पतालका निर्देशक डा. केदार सेन्चुरीले बताए । वीर अस्पताललाई कोभिड अस्पताल बनाउने निर्णय भइनसकेको तर छलफलका क्रममा रहेको उनले बताए।

हाल नन-कोभिडका बिरामीभन्दा कोभिडका बिरामी बढी आउन थालेकाले वीर अस्पताललाई कोभिड अस्पताल बनाउन आवश्यक रहेको उनले बताए । वीरलाई कोभिड विशेष अस्पताल बनाइएपनि इमरजेन्सी, डायलासिस र नेफ्रोलोजी सेवा भने यहीबाट दिइने उनले जानकारी दिए ।

अन्य सेवा भने ट्रमा सेन्टरबाट व्यवस्थापन गर्ने अस्पतालको तयारी छ । उनले भने, ‘कोभिड अस्पताल बनाएपनि कोरोना संक्रमितको मात्र उपचार हुने हैन । इमरजेन्सी, डायलासिस र नेफ्रोलोजी सेवा यहीबाट दिइन्छ । अन्य सेवा भने ट्रमा सेन्टरमा व्यवस्थापन गर्ने तयारी गर्दैछौं।’