काठमाडौं । नेपाल चिकित्सक संघका अध्यक्ष डा. लोचन कार्कीले चिकित्सक तथा स्वास्थ्यकर्मीमाथि दुर्व्यवहार नगर्न आग्रह गरेका छन् । निषेधाज्ञा तथा लकडाउनको समयमा सबै व्यक्तिहरु घरमै रहेको अवस्थामा चिकित्सक तथा स्वास्थ्यकर्मी घरपरिवारसमेत छाडेर बिरामीको स्वास्थ्य उपचारमा खटिएको भन्दै उनले चिकित्सकमाथि कुनैपनि किसिमको दुर्व्यवहार नर्गन आग्रह गरेका हुन् ।

डा. कार्कीले कोरोनाविरुद्धको लडाइँ चिकित्सककै प्रयासले मात्र जित्न नसकिने भन्दै यसमा सबैले साथ र सहयोग दिन पनि आग्रह गरे । काठमाडौं लगायतका शहरी क्षेत्रमा नै समाज तथा घरबेटीले गर्ने दुर्व्यवहारले गर्दा चिकित्सक तथा स्वास्थ्यकर्मीको मनोवल कमजोर हुने पनि डा. कार्कीले बताए ।

उनले आगामी दिनमा चिकित्सक तथा स्वास्थ्यकर्मीमाथि दुर्व्यवहारको घटना नहुने समते अपेक्षा गरे । डा. कार्कीले नेपालमा कोरोना संक्रमण र मृत्युदर बढ्दै गएको पनि बताए । उनले जनस्वास्थ्यको मापदण्ड अपनाएमा कोरोना संक्रमण नसर्ने पनि बताए । उनले कोरोना संक्रमणबाट बच्न जनस्वास्थ्यको मापदण्ड पालना गर्न सर्वसाधारणलाई आग्रह गरेका छन् ।

घरमै सुरक्षित रुपमा होम आइसोलेसनमा रहेका संक्रमितसँग जनस्वास्थ्यको सुरक्षा अपनाउँदा डराउन नपर्ने उनको भनाइ छ । घर तथा समाजमा रहेका कोरोना संक्रमितलाई हेला र दुर्व्यवहार गर्न नहुने पनि उनले बताए । उनले कोरोना संक्रमण जो सुकैलाई पनि हुनसक्ने र रोल लागेपछि स्वास्थ्यकर्मीले नै हेरचाह गर्नुपर्ने भएकाले स्वास्थ्यकर्मीको मनोबल बढाउन पनि आग्रह गरे ।