काठमाडौं । नेकपा अध्यक्ष तथा प्रधानमन्त्री केपी शर्मा ओली र अध्यक्ष पुष्पकमल दाहाल ‘प्रचण्ड’बीच  बालुवाटारमा वान टु वान वार्ता शुरू भएको छ ।

प्रधानमन्त्रीका प्रेस सल्लाहकार सूर्य थापाले छलफलमा अध्यक्षद्वय मात्रै जुटेको  जानकारी दिए। पार्टीभित्रको विवादलाई लिएर आइतबार पनि ओली दाहालबीच वार्ता भएको थियो।

आइतबारको वार्तामा ओली पक्षबाट महासचिव बिष्णु पौडेल र शंकर पोखरेल र अध्यक्ष दाहाल तर्फबाट जनार्दन शर्मा र वर्षमान पुन सहभागी थिए। आइतबारको बैठक सकारात्मक भएको बताएपनि निर्णय लिन सकेन।

पार्टी भित्रको समस्या समाधान गर्न दोस्रो तहका बैठकमा सहभागी ४ नेतालाई जिम्मा दिइएको छ।  यता, स्थायी कमिटी बैठक असार २४ गतेसम्म स्थगित भएको छ।  बैठक २४ गते बुधबार ११ बजेसम्म स्थगित भएको नेकपाले जनाएको छ ।