काठमाडौं । लकडाउनको मोडालिटीलगायतका विषयमा छलफल गर्न आज दिउँसो २ बजे मन्त्रिपरिषद बैठक बस्ने भएको छ ।

कोरोना भाइरस (कोभिड–१९) को संक्रमण रोकथाम तथा नियन्त्रणका लागि गरिएको लामो समयको लकडाउनले धेरैको जीविकोपार्जनमा समस्या भएपछि सरकारले लकडाउनको मोडालिटी परिवर्तन गर्ने तयारी गरेको छ ।

गत चैत ११ गतेदेखि नेपालभर गरिएको लकडाउन जेठ मसान्तसम्म जारी छ ।

उपप्रधानमन्त्री ईश्वर पोखरेलको नेतृत्वको कोभिड १९ (कोरोना भाइरस) रोकथाम तथा नियन्त्रण उच्चस्तरीय समितिले लकडाउन खुकुलो बनाउने प्रस्ताव तयार पारेर मन्त्रिपरिषदमा बुझाइसकेको छ ।

दुई हप्ताको एक चरण गरी पाँच चरणमा लकडाउन क्रमशः खुकुलो बनाउने प्रस्ताव मन्त्रिपरिषदमा पुगेको छ ।

यसअघि कोभिड १९ क्राइसिस म्यानेजमन्ट सेन्टर (सीसीएमसी) ले ६ चरणमा लकडाउन खुकुलो गर्ने गरी प्रस्ताव बुझाएको थियो ।