काठमाडौं । क्वारेन्टिन तथा आइसोलेसनमा रहेका एक बालिकासहित ३ जनाको मृत्यु भएको छ ।

दुइ जनाकाे अस्पतालमा मृत्यु भएकाे हाे भने एक जनाले आत्महत्या गरेका हुन् ।

जिल्ला अस्पताल बाजुराको आइसोलेसनमा २ वर्षीया बालिकाको मृत्यु भएको हो । भारतबाट नेपाल आएकी उनलाई स्वास्थ्यमा समस्या आएपछि बाजुराको जिल्ला अस्पतालमा भर्ना गरिएको थियो ।

उपचारकै क्रममा शनिबार राति करिब २ बजे उनको मृत्यु भएको अस्पतालले जनाएको छ ।

उनीहरु ८ दिन पहिले कैलालीका गौरिफन्टा नाकाबाट आएका थिए । गाउँकै क्वारेन्टिानमा ४ दिन बसेर समस्या आएपछि उनलाई अस्पताल ल्याइएको थियो ।

त्यसैगरी डडेल्धुरा बहुमुखी क्याम्पस क्याम्पसमा रहेको क्वारेन्टिानमा ६ वर्षीय बालकको मुत्यु भएको छ ।

कैलालीको गौरी फन्टा नाकाबाट उद्धार गरी शनिबार राति १२ बजेतिर डडेल्धुरा बहुमुखी क्याम्पसको ल्याइएका बालकलाई शारीरिक समस्या देखिएपछि विहान ३ बजे डडेल्धुरा अस्पताल लगिएको थियो । अस्पताल पुर्याएपछि उनको मृत्यु भएको हो ।

त्यसैगरी क्वारेन्टिनमै बसेका गुल्मीमा एक व्यक्तिले आत्महत्या गरेका छन् । छत्रकोट गाउँपालिका–४ दिगामस्थित आदर्श माविको क्वारेन्टाइनमा बसेका ५६ वर्षीय चन्द्रबहादुर परियारले आत्महत्या गरेका हुन् । उनी भारतबाट शनिवार बिहान मात्र आइपुगेर क्वारेन्टिनमा बसेका थिए ।

कोरोनाका कारण यसअघि मृत्यु भएका सात जनामध्ये ६ जनाको पिसिआर रिपोर्ट मृत्युपछि मात्रै आएको थियो । अहिले पनि त्यहि घटना दोहोरिन सक्ने देखिएको छ ।