काठमाडौं । भारतबाट स्वदेश फर्कदै गर्दा सिमामा नै मृत्यु भएका युवकमा कारोना संक्रमण देखिएको पुष्टि भएको छ ।

गत जेठ १० गते भारतबाट अर्घाखाँची आउँदै गर्दा बाटोमै उनको मृत्यु भएको थियो ।

ति युवकको कोरोना परीक्षण गर्दा रिपोर्ट पोजेटिभ देखिएको प्रमुख जिल्ला अधिकारी विजय पौडेलले पुष्टि गरेका छन् ।

अर्घाखाँची भूमिकास्थान नगरपालिका–९ चरेपानीका ति युवकको कपिलवस्तु ल्याएर पोस्टमाटम गरिएको थियो भने त्यहीँबाट स्वाब निकालेर कोरोना परीक्षणका लागि भैरहवा जनस्वास्थ्य प्रयोगशालामा पठाइएको थियो ।

भैरहवा जनस्वास्थ्य प्रयोगशालामा गरिएको पीसीआर परीक्षणबाट उनी कोरोना संक्रमित पुष्टि भएको अर्घाखाँची अस्पतालका सूचना अधिकारी विजय विकले बताए ।

घर फर्किने क्रममा मृत्यु भएका युवकको शवलाई उनको आफन्तले सन्धिखर्कस्थित गच्चे भन्ने स्थानमा गाडेका थिए।

ति युवासँगै भारतको गुजरात हुँदै दुईटा बसमा अरु नेपालीहरु पनि आएका थिए ।

उनले बाटोमा साथीहरुसँग खाना खाएपछि वान्ता गरेका थिए । आगरा पुगे पछि मृतकले छाती दुखेको बताएपछि लखनउ अस्पतालमा लैजानेक्रममा उनको बाटामै मृत्यु भएको थियो ।

दुई वटा बसमा कुल ९८ जना यात्री थिए । उनीहरुको तथ्या‌ंक संकलन सुरु भइसकेको प्रजिअ पौडेलले बताए।

यसअघि नेपालमा सिन्धुपाल्चोक, बाँके, गुल्मी, बारा र ललितपुरमा गरी पाँच जनाको कोरोनाका कारण ज्यान गइसकेको छ ।

यद्यपी उनको मृत्युलाई कोरोनाका कारण नेपालभित्र मृत्यु भएकाको संख्यामा गन्ने कि नगन्ने भन्ने अन्यौल देखिएको छ।

उनको स्वाब परीक्षण र दाहसंस्कार नेपालमै गरिएको भए पनि स्वास्थ्य मन्त्रालयले भने नेपालमा मृत्यु भएको मान्ने कि नमान्ने भन्ने बिषयमा अन्योल भएको भन्दै निर्णय गरेको छैन ।