काठमाडौं । नेपाली सेनाको एक सेक्सन प्लस फौज दार्चुलाको घाँटीबगर क्षेत्रमा पुगेको छ ।

मन्त्रिपरिषदको गत वैशाख १४ गतेको बैठकले महाकाली करिडोर (दार्चुला टिंकर सडक योजना) अन्तरगत उत्तरीतर्फ रहेको ८७ कि।मि। सडक खण्ड नेपाली सेना मार्फत निर्माण गराउने निर्णय गरेको थियो ।

जसअनुसार घाँटीबगर इलाका नजिकको थी भन्ने स्थानमा नेपाली सेनाको एक सेक्सन प्लस फौज तैनाथ भएको हो ।

सो सडक खण्ड अन्तरगत त्यहाँ तैनाथ सेनाले दार्चुलाको व्यास गाँउपालिका वडा नम्बर २ स्थित घाँटीबगर इलाकामा करिव २ मिटर चौडाईको ४५० मिटर गोरेटो–घोडेटो बाटो निर्माण गर्ने सैनिक जनसम्पर्क निर्देशनालयले जनाएको छ ।

नेपाली सेनाद्धारा जारी विज्ञप्तिमा भनिएको छ–‘व्यास गाँउपालिका २ स्थित घाँटीबगर इलाकामा करिव २ मिटर चौडाइको ४५० मिटर गोरेटो(घोडेटो बाटो निर्माण कार्यको लागि आवश्यक सुरक्षा तथा बन्दोबस्तीको निमित्त आज घाँटीबगर इलाका नजिकको थी भन्ने स्थानमा नेपाली सेनाको एक सेक्सन प्लस फौज तैनाथ भएको छ ।’

चीन र भारतको सीमा नाका समेत पर्ने दार्चुलाको व्यास १ मा पर्ने छाङरु र टिंकर गाउँका करिब १८२ घर परिवार सो बाटो निर्माणपछि लाभान्वित हुनेछन् ।

घाँटीबगर र मौरी भिर ईलाकामा पर्ने ४५० मिटर सडक खण्ड अविलम्ब सुचारु गर्न दार्चुला जिल्ला सुरक्षा समितिले सेनालाई जिम्मा दिने निर्णय गरेको थियो ।

सडक खण्ड सुचारु भए पश्चात स्थानीय बासिन्दा नेपालकै भूमी प्रयोग गरी आवत जावत गर्न सक्नेछन्।