काठमाडौं । चीनबाट सुरू भइ विश्वभर फैलिरहेकाे काेराेना भाइरस नेपालमा फैलिन नदिनकाे लागि सरकारले घोषणा गरेको प्रतिबन्ध उल्लंघन गर्दै विदेशी २ विमान कम्पनीले नेपाली नागरिकलाई काठमाडाैँ ल्याएका छन्। उक्त २ विदेशी विमानले ६१ जना नेपालीलाई काठमाडौं ल्याएका हुन् ।

अध्यागमन विभागकाअनुसार थाइ एयरवेजले ४९ र एयर इण्डियाले १२ जना नेपालीलाई त्रिभुवन अन्तर्राष्ट्रिय विमानस्थलमा ल्याएका हुन् । उनीहरुलाई खरिपाटीस्थित नेपाल विद्युत प्राधिकरणको तालिम केन्द्रस्थित क्वारेन्टाइनमा पठाइएको छ ।

दुबई कतार लगायतका देशहरुमा रहेका नेपालीहरु अन्यत्र ट्रान्जिट बनाएर आएका हुन् । यसअघि यसरी आउने विदेशी नागरिकहरुलाई फर्काउने गरिएको थियो । यस्तै यसअघि सरकारले चीनकाे वुहानबाट ल्याएकाे १ सय ७५ नेपाली विद्यार्थीलाई पनि खरिपाटीस्थित नेपाल विद्युत प्राधिकरणको तालिम केन्द्रस्थित क्वारेन्टाइनमा राखेकाे थियाे।