काठमाडौं। घर परिवारबाटै आपराधिक कृयाकलाप बढ्न थालेपछि प्रहरीकाे समेत टाउको दुःखाइको विषय बनेको छ । आफ्नै परिवारबाट हत्या जस्तो जघन्य अपराध हुन थालेपछि प्रहरीलाई अनुसन्धान गर्न मुस्किल पर्दा दिन प्रतिदिन यस्ता घटनाहरुबढिरहेका छन् ।

यसको पछिल्लो उदाहरण हो, पर्सा र उदयपुरको ।
आफ्नै १५ वर्षीया छोरीको हत्या गरी शव जलाएर गाडेको आरोपमा आमासहित ४ जना पक्राउ र दलित भन्ने थाहा पाएपछि श्रीमतीको हत्या गर्ने श्रीमान्, ससुरा र देवर जेल चलान भएका छन् ।

यी त प्रतिनिधि घटनामात्र हुन् । घर परिवारबाट हुँदै आएका यस्ता घटनाहरु बढ्दै जाँदा जीउ धनको सुरक्षामाथि प्रश्न चिन्ह खडा भएको छ ।

आफ्नै छोरीको हत्या गरेको आरोपमा पक्राउ पर्नेमा पर्साको पोखरिया नगरपालिका–९ शिवबर्वाकी ३० वर्षीया शिवकली देवी, ३९ वर्षीय राजेन्द्र महतो तत्वा, २८ वर्षीय सन्तोष महतो तत्वा र ट्याक्टर चालक वडा नम्बर ८ बस्ने १९ वर्षीय सुबोध भन्ने जितेन्द्र यादव रहेका छन् ।

प्रहरीका अनुसार पक्राउ परेकी शिवकली बालिकाकी आमा हुन् भने राजेन्द्र र सन्तोष काका हुन् । पुनिताका बुवा वीरेन्द्र दास तत्वा भने फरार रहेको पर्सा प्रहरीले जनाएको छ ।

पुनिताको हत्या परिवारकै सदस्यबाट भएको आशंका प्रहरीले गरेको छ । कुटपिट गरेर मारेको आशंकामा आमा शिवकलीसहित ४ जनालाई नियन्त्रणमा लिएर अनुसन्धान अघि बढाएको जिल्ला प्रहरी कार्यालय पर्साले जनाएको छ ।

इलाका प्रहरी कार्यालय पोखरीयाका प्रहरी निरीक्षक चन्द्र सिंहसहितको टोलीले गोप्य सूचनाको आधारमा घटनास्थल पुगेर निरीक्षण गर्दा पेट्रोलियम पदार्थ हालेर शव जलाएको र बचेको भाग अलि पर लगेर गाडेको तथ्य फेला पारेको हो ।

त्यसैगरी आफ्नी बुहारी दलित भएको थाहा पाएपछि ससुराले छोरालाई फकाई फुल्याई बुहारीको हत्या गरेको अभियोगमा तीन जना जेल चलान भएका छन् ।

लामो समयसम्म प्रेम सम्बन्धमा बसेका उदयपुर कटारी नगरपालिका–४ सिम्लेका गोविन्द कार्कीले र उदयपुरगढी–५ बाहुनीटारकी संगीता विश्वकर्माको २०७४ असोज २९ गते बिहे भएको थियो । बुहारी दलित भएको थाहा पाएलगत्तै गोविन्द, उनको बुबा र भाई मिलेर संगिताको हत्या गरेको अहिले आएर खुलेको छ ।

विहे गरेको १५ दिन पछि २०७४ साल कात्तिक १४ गते संगीताको शव सिम्लेको एक जंगलमा फेला परेको थियो । झुण्ड्याएर हत्या गरी मान्छे नचिनियोस् भनेर उनीहरूले संगीताको अनुहारमा एसिड पनि छ्यापिदिएको अहिले आएर खुलेको छ ।

शव फेला पर्नाबित्तिकै माइती पक्षले तीनै जनाविरूद्ध किटानी जाहेरी दिएका थिए । लामो समयसम्म भागेर बसेका उनीहरुमाथि प्रहरीले सुक्ष्म निगरानी भने गरिरहेकै थियो । संगिताको हत्या भएपछि उनीहरु नेपाल छाडेर भारततिर गएका थिए ।

गत मंसिर २२ गते मनबहादुर (संगिताका देवर) लाई प्रहरीले घरबाटै पक्राउ गरेपछि नैनबहादुर (ससुरा) र गोविन्द काठमाडौंमा रहेको पत्ता लाग्यो। दुवैलाई प्रहरीले काठमाडौंको कपनबाट २३ मंसिरमा नियन्त्रणमा लियो।

तीनै जनालाई कर्तव्य ज्यान मुद्दामा अनुसन्धान थालेपछि उनीहरूले घटना कबुल गरेका थिए ।

आइतबार तीनै जनाविरूद्ध मुद्दा दर्ता भएपछि अदालतले पुर्पक्षका लागि थुनामा पठाएको थियो भने सोमबार कारागार चलानको आदेश दिएको छ ।