धनगढी । जिल्ला प्रहरी कार्यालय कैलालीले भुपेन्द्र बडुवाल हत्या प्रकरणमा संलग्न रहेको आरोपमा थप एक अभियुक्तलाई पक्राउ गरेको छ।

पक्राउ पर्नेमा लम्कीचुहा नगरपालिका–३ चिसापानीका १९ वर्षीय मदन शाही रहेका छन्। शाही प्रहरी इन्स्पेक्टरका भाइ समेत रहेको प्रहरी स्रोतको भनाइ छ।

शाहीलाई इटहरीबाट पक्राउ गरिएको प्रहरीले जनाएको छ। केही दिनअघि पक्राउ परेका शाहीलाई प्रहरीले सोमबार सार्वजनिक गरेको हो ।

गत कात्तिक २३ गते राति टीकापुर नगरपालिका–१ सिद्धार्थ होटल नजिकै लम्कीका भूपेन्द्रको हत्या भएको थियो । घटनापछि शाही भागेर सुनसरी पुगेका प्रहरीले जनाएको छ ।

प्रहरीले चिसापानीका होटल संगमका सञ्चालक नवीन रावलको योजनामा बडुवालमाथि खुकुरी प्रहार भएको दाबी गर्दै आएको छ । यद्यपि रावल अझै फरार छन् । उनको खोजी भइरहेको प्रहरीले जनाएको छ।

यसअघि नै प्रहरीले हत्यामा संलग्न रहेको आरोपमा १० जनालाई पक्राउ गरिसकेको छ । यद्यपि प्रहरीले भूपेन्द्रको हत्याको ठोस कारणअझै पत्तो लगाउन सकेको छैन ।

यस बिषयमा प्रहरीको केन्द्रीय अनुशन्धान ब्युरो (सीआईबी)को टोलीले घटनाबारे अनुसन्धान गरिरहेको छ ।