काठमाडौं । पछिल्लो २४ घण्टामा देशभर थप ३ सय ६ जनामा कोरोना सङ्क्रमण पुष्टि भएको छ भने सोही अवधिमा ३४८ जना सङ्क्रमणमुक्त भएका छन्।

स्वास्थ्य तथा जनसंख्या मन्त्रालयका अनुसार ८ हजार ८०८ पीसीआर परीक्षणमा २९१ र १ हजार ५९८ एन्टिजेन परीक्षणमा १५ जना गरी ३०६ जनामा संक्रमण पुष्टि भएको हो ।

पछिल्लो २४ घण्टामा जम्मा ९ हजार ६०६ जनाको कोरोना परीक्षण गरिएको मन्त्रालयले जनाएको छ ।

यस्तै, मन्त्रालयका अनुसार हाल देशभर ७ हजार २१५ जना सक्रिय सङ्क्रमित रहेका छन् । नेपालमा निको हुने दर ९७.७ प्रतिशत रहेको छ ।

त्यस्तै, कोरोना सङ्क्रमणबाट थप ६ जनाको मृत्यु भएको छ । हालसम्म देशमा कोभिड–१९ बाट ज्यान गुमाउनेको सङ्ख्या ११ हजार ४७७ को पुगेको छ ।

देशभर थप १५ हजार ९०६ जनाले कोरोनाविरुद्धको खोप पनि लगाएका छन् ।