काठमाडौं । वरिष्ठ अधिवक्ता बद्रीबहादुर कार्कीले प्रधान्यायाधीश चोलेन्द्रशमशेर जबरालाई राजीनामा दिन सुझाव दिएका छन् ।

सोमबार नेपाल बार एशोसिएसनको धर्ना कार्यक्रममा पत्रकारहरुलाई प्रतिक्रिया दिंदै वरिष्ठ अधिवक्ता कार्कीले प्रधानन्यायाधीश जबराको राजीनामामै न्यायपालिकाको भविष्य उज्ज्वल भएको बताए ।

कार्कीले भने, ‘सम्माननीयज्यूले धेरैको भाग्य निर्धारण हुने गरी फैसला गर्नुभाछ, अब आफ्नै फैसला आफैं लेखेर अदालतको सम्मान हुने गरी ससम्मान बिदा हुनुहोस् । यसैमा नै नेपालको न्यायपालिकाको भविष्य उज्ज्वल छ ।’

यसैबीच, प्रधानन्यायाधीशको राजीनामा माग्दै ‘हड्ताल’ मा उत्रिएका न्यायाधीशहरू अन्ततः इजलास फर्किएका छन् । कात्तिक ८ देखि आन्दोलनरत् न्यायाधीशहरू आजबाट इजलास प्रवेश गरेका हुन् ।

सर्वोच्चका १५ जना न्यायाधीशहरू बेन्च बहिष्कार गरेर संवादहिनतामा रहेका थिए । असन्तुष्ट न्यायाधीशहरूले प्रधानन्यायाधीशसँग वार्ताका लागि अनिल सिन्हा, सपना प्रधान मल्ल र मनोज शर्मा सम्मिलित तीन सदस्यीय वार्ता टोली गठन भएपछि हिजै वार्ता भएको थियो ।

प्रधानन्यायाधीशले सम्मानजनक बहिर्गमनको सन्देश पठाएका कारण वार्ता टोलीले त्यस्तो बहिर्गमनको अर्थ खोजेको बताइएको छ । त्यसको निश्चित गर्न पनि वार्ता टोली तथा असन्तुष्ट न्यायाधीशहरूबीच छलफल भइरहेको छ ।

प्रधानन्यायाधीशले आज पेसी तोक्दा बन्दी प्रत्यक्षीकरणबाहेकका अरु मुद्दा स्थगित गरेका थिए । आज बन्दी प्रत्यक्षीकरण मुद्दा सुनुवाइका लागि ६ वटा इजलास गठन गरिएका छन् ।

यद्यपी प्रधानन्यायाधीश राणाले आज भने आफूलाई इजलास तोकेका छैनन्। सरकारमा भाग खोजेपछि उनको राजीनामा माग भइरहेको बेला उनले आफूलाई इजलास तोक्दै आएका थिए। तर आज उनले आफूलाई इजलास तोकेनन्।