काठमाडौं । विश्वासको मत लिन लागेका प्रदेश १ का मुख्यमन्त्री भीम आचार्यले आफ्नो पक्षमा बहुमत नपुग्ने भएपछि राजीनामा दिने भएका छन् ।

प्रदेश सभाको आजको बैठकमा उनले विश्वासको मत लिने कार्यसूचि रहेको थियो। तर बहुमत नपुग्ने भएपछि उनले त्यस अगाडि नै राजीनामा दिन लागेका स्रोतले जानकारी दिएको छ ।

प्रदेश १ मा ९२ सांसद सासद छन् । एमालेसँग सभामुखसहित ४१ सांसद छन् । कांग्रेसका २१, माओवादी केन्द्रका १५, नेकपा (एकीकृत समाजवादी) का १०, जनता समाजवादीका ३ जना र संयुक्त लोकतान्त्रिक राष्ट्रिय मञ्चका एक र राप्रपाको एक सिट रहेको छ।

विपक्षी गठबन्धनले मुख्यमन्त्रीमा नेकपा (एस) प्रदेश १ संसदीय दलका नेता राजेन्द्र राईलाई अगाडि सार्ने निर्णय गरिसकेकाे छ ।

आचार्य गत भदौं १० गते मुख्यमन्त्रीमा  नियुक्त भएका थिए । यो सँगै प्रदेश एकमा पनि केपी शर्मा ओली नेतृत्वको एमाले सरकार ढलेको छ। यसअघि बागमती प्रदेशमा पनि एमालेको सरकार ढलेर नेकपा एसका नेता राजेन्द्र पाण्डे मुख्यमन्त्रीमा नियुक्त भएका थिए।