काठमाडौं । विवादमा मुछिएका प्रधानन्यायाधीश चोलेन्द्र शमसेर जबराले आन्दोलनरत कानुन व्यवसायीहरुलाई आफूले सम्मानजनक बर्हिगमन चाहेको बताएका छन् ।

पछिल्लो समय सर्वोच्चका १९ न्यायाधीशहरुले प्रधानन्यायाधीश जबराले पदको गरिमा राख्न नसकेको भन्दै राजीनामाको माग गर्दै आएका बेला उनले यस्तो बताएका हुन्।

आइतबार सर्वोच्चका न्यायाधीशसहित नेपाल बार एसोशिएन र अन्य कानुन व्यवसायी आन्दोलनमा उत्रिएपछि अप्ठ्यारोमा परेका जबराले आफूले सम्मानजनक बर्हिगमन चाहेको बताएको स्रोतको भनाइ छ।

स्रोतका अनुसार आन्दोलनरत न्यायाधीशहरुसँगको छलफलमा प्रधानन्यायाधीश जबराले सम्मानजनक बर्हिगमनको प्रस्ताव राखेका हुन् । पछिल्लो घटनाक्रमअनुसार आन्दोलनरत सर्वोच्चका न्यायधीशहरुले प्रधानन्यायाधीशसँग छलफल गर्न तीन सदस्यीय टोली गठन गरेको थियो ।

न्यायाधीश अनिलकुमार सिन्हा, सपना प्रधान मल्ल र डा. मनोजकुमार शर्मा सम्मिलित टोलीसँग जबराले यस्तो प्रस्ताव राखेको एक न्यायाधीशले बताए ।