काठमाडौँ । महानगरीय प्रहरी अपराध महाशाखाले काठमाडौँ उपत्यकाभित्र शृंखलाबद्ध रुपमा चोरी गर्दै हिड्ने एक जनालाई पक्राउ गरेको छ। पक्राउ पर्नेमा रामेछाप जिल्ला घर भइ काठमाडौँ कोटेश्वर बस्ने ३१ बर्षीय कमल थापा मगर रहेका छन्।

महाशाखाका एसपी कृष्णप्रसाद कोइरालाका अनुसार पक्राउ परेका कमलले काठमाडौँ उपत्यकाभित्र रहेका विभिन्न सहकारी तथा वित्तीय संस्थाहरु रातको समयमा र मानिसहरुको घरमा दिउँसो कोही नभएको मौका पारी चोरी  गर्दै आएका थिए ।

पछिल्लो समय उपत्यकाभित्र चोरीको घटना बढ्दै गएपछि महाशाखाबाट खटिएको प्रहरीको टोलीले कमललाई बिहीबार कोटेश्वरबाट पक्राउ गरेको एसपी कोइरालाले जानकारी दिए।  पक्राउ परेका कमलले बिगत एक बर्षदेखि हालसम्म काठमाडौँ उपत्यकाका विभिन्न स्थानका घर तथा संस्थाबाट लाखौं रकम चोरी गरेको प्रहरीको अनुसन्धानमा खुल्न आएको महाशाखाको भनाइ छ।

महाशाखाको टोलीले उनको साथबाट चाबी फुटाउन प्रयोग हुने फलामको रड २ थानसहित मोबाइल र केही नगद समेत बरामद गरेको जनाएको छ। उनलाई थप आवश्यक अनुसन्धान तथा कारवाहीको लागि महानगरीय प्रहरी परिसर टेकु पठाइएको एसपी कोइरालाले बताए।