काठमाडौं । माल्दिभ्समा जारी साफ च्याम्पियनसिप फुटबल अन्तर्गत अहिले नेपाल र बंगलादेशबीच प्रतिस्पर्धा भइरहेको छ । मालेस्थित राष्ट्रिय रंगशालामा जारी खेलको पहिलो हाफ सकिदा नेपालविरुद्ध बंगलादेशले १-० गोलको अग्रता बनाएको छ ।

बंगलादेशका लागि खेलको नवौं मिनेटमा सुमन रिजाले गोल गर्दै सुरुआती अग्रता दिलाएका हुन् । पहिलो हाफमा बल पोसेसनमा पकड बनाएको नेपालले केहि गोलको अवसर खेर फालेको थियो ।

नेपालले फाइनलको यात्रा तय गर्न आजको खेलमा कम्तिमा बराबरी खेल्नु पर्नेछ। नेपाल ३ खेलमा ६ अंक जोडेर शीर्ष स्थानमा रहेको छ ।

नेपालले सुरुआती दुई खेलमा लगातार जित निकालेको थियो । माल्दिभ्सलाई १-० ले हराएको नेपालले श्रीलंकालाई ३-२ ले हराएको थियो । तर, नेपाल आइतबार भारतसँग १-० ले पराजित भएको थियो ।