काठमाडौं । नवप्रवेशी नेकपा एमालेका नेता एवं पूर्वमन्त्री प्रभु साहले आठ बुँदे माग राख्दै पार्टी अध्यक्ष केपी शर्मा ओलीलाई चुनौती दिएका छन् । ती माग सम्बोधन नभए एमालेमा बस्न नसक्ने उनले बताएका छन् ।

पूर्वमाओवादी नेता साहले एमालेमा आफ्नो हैसियत खोज्दै जनताको बहुदलीय जनवाद नभइ नेकपाले अपनाएको जनताको जनवादलाई महाधिवेशनमा लैजानु पर्ने माग राखेका छन् ।

यस्तै, एमालेको जेठ २ अघिको वैधानिक कमिटी र पदाधिकारीलाई कायम गर्दा माओवादीको केन्द्रको वैधानिक कमिटी र पदीय हैसियतअनुसार मिलान गर्नुपर्ने माग राखेका छन् ।

साहको हैसियत अहिले एमालेको केन्द्रीय सदस्य छ । तर, उनले एमालेका स्थायी कमिटी सदस्य माग गरेका छन् । रौतहटमा राम्रो प्रभाव रहेका साह माओवादीबाट एमाले बनेका प्रतिनिधिसभाका चार पूर्वसांसदमध्ये सबैभन्दा बलियो जनाधार भएका नेता हुन् ।

यस्तै, नेता साहले आर्मीलाई पार्टीको सांगठनिक रुपमा विस्तार गर्ने, प्रदेश २ मा पदाधिकारी चयन तथा कार्यविभाजनमा पहिले भएको सहमतिको कार्यन्वयन गर्नुपर्ने जस्ता माग राखेका छन्।