रोल्पा । सदरमुकाम लिबाङदेखि करिब २० किलोमिटर उत्तरमा रहेको रोल्पा नगरपालिका -१० धबाङमा घरमाथिबाट पहिरो खस्दा दुईजनाको मृत्यु भएको छ ।

सोमबार बिहान २ बजेतिर खसेको पहिरोले घर पुरिदा गाम्दा गाउँका ६७ वर्षीया गौसरी थापा र छोरीतर्फका ६ वर्षीय नाती हिमाल रोकाको मृत्यु भएको रोल्पा नगरपालिका-८ धबाङका वडा सदस्य शेरबहादुर थापाले जानकारी दिए।

थापाका अनुसार पहिरोले घर भत्किदा घरभित्रै सुतिरहेका दुईजनाको मृत्यु भएको थियो भने दुईजना घरभित्रै च्यापिएका थिए । मृतक गौसरीका छोरी भिमकुमारी थापा र ज्वाई मनबहादुर रोका घाइते भएका छन् ।

दुर्घटनाको खबर पाएपछि सदरमुकाम लिबाङबाट प्रहरी टोली घटनास्थल गएको छ । गाउँलेको सहयोगमा मृतकको शव निकालिएको र राति नै घाइतेको उद्धार गरिएको आफन्त शेरबहादुरले जनाए ।

घाइतेलाई उपाचारका लागि नजिकैको रेउघा अस्पताल पठाइएको छ ।