हेटाैंडा । बागमती प्रदेशकी मुख्यमन्त्री अष्टलक्ष्मी शाक्य अल्पमतमा परेकी छन् । शाक्य अल्पमतमा परेपछि अब प्रदेशको मुख्यमन्त्रीमा नेकपा एकीकृत समाजवादीले दाबी गर्ने भएको छ ।

पार्टी विभाजित भएसँगै मंगलबार बागमती प्रदेश निर्वाचन आयोगको कार्यालय हेटौंडामा पुगेर नेकपा एमालेका १२ जना सांसदले नेकपा एकीकृत समाजवादी राेजेसँगै मुख्यमन्त्री शाक्य अल्पमतमा परेकी हुन् ।

अर्को पनि पढ्नैपर्ने

अष्टलक्ष्मी शाक्य मुख्यमन्त्री बनेको १३ दिनमै अल्पमतमा, बधाईको माला समेत ओइलाउन पाएन !

निर्वाचन आयोगले प्रदेश र स्थानीय तहका जनप्रतिनिधिलाई दल रोज्न यही भदौं २२ गते साँझ ५ बजेसम्मको समय दिएको थियो । त्यही अनुरुप मंगलबार एमालेका १२ जना सांसदले आयोगको प्रदेश कार्यालय गएर एकीकृत समाजवादी रोजेको जानकारी दिइ सकेका छन् ।

‘आगामी २३ गते आयोगले हाम्रो दलमा सांसद संख्या यति छ भनेर तथ्यांक दिन्छ, लगत्तै हामी प्रदेशसभामा पेश गर्छौं,’ एकीकृत समाजवादीका सांसद राजेन्द्र पाण्डेले भने, ‘त्यो दिनदेखि सरकार अल्पमतमा पर्यो ।’

यस्तै, नेता पाण्डेले वर्तमान सरकार जोगाउने कुनै बाटो नभएको र अब एकीकृत समाजवादीको नेतृत्वमा नयाँ सरकार बन्ने दाबी गरे। आयोगको परिसरमा पत्रकारहरुले उसो भए अब को मुख्यमन्त्री को त भनेको पश्नमा जवाफ दिँदै पाण्डेले भने,’पार्टीले मलाई नै अगाडि सारेको छ,सत्तारुढ गठबन्धनमा पनि म सबैको सहमतिको उम्मेदवार हुँ ।’

गत भदौं २ गते तत्कालिन मुख्यमन्त्री डोरमणि पौडेलले राजिनामा दिएपछि प्रदेश प्रमुख विष्णु प्रसाईंले शाक्यलाई एकल बहुमतको मुख्यमन्त्री नियुक्त गरेका थिए । त्यही दिन एमाले फुटेर नेकपा समाजवादी एकीकृत बनेको थियो।