सिरहा । पूर्वपश्चिम राजमार्गअन्तर्गत सिरहाको धनगढीमाई नगरपालिका–६ मा मोटरसाइकलको ठक्करबाट एकजनाको मृत्यु भएको छ। स १० प ४२४७ नंको मोटरसाइकलले ठक्कर दिँदा तत्काल सनाखत हुन नसकेको अन्दाजी १७ वर्षीय किशोरको मृत्यु भएको प्रहरीले जनाएको छ।

पैदल हिँडिरहेका ती किशोरलाई मोटरसाइकलले ठक्कर दिँदा गम्भीर घाइते भएका थिए। उपचारका लागि अस्पताल लैजाँदै गर्दा बाटोमै मृत्यु भएको प्रहरीले जनाएको छ।

मोटरसाइकल दुर्घटना हुँदा एकको मृत्यु

रोल्पा । रोल्पामा मोटरसाइकल दुर्घटनामा एकजनाको मृत्यु भएको छ। मुत्यु हुनेमा रोल्पा नगरपालिका–२ धनमुढा निवासीे ५५ वर्षीय खड्कबहादुर बुढा रहेको जिल्ला प्रहरी कार्यालय रोल्पाका प्रहरी नायब उपरीक्षक नरेशराज सुवेदीले जानकारी दिएका छन्।

सुनिलस्मृति गाउँपालिका–१ सेरास्थित रा ६ प ८८६६ नंको मोटरसाइकल दुर्घटना भएको प्रहरी प्रमुख सुवेदीले बताए। रोल्पाको सदरमुकाम लिबाङबाट प्यूठान जाँदै गरेको उक्त मोटरसाइकल अनियन्त्रित भई दुर्घटना भएको प्रहरी नायब उपरीक्षक सुवेदीले जानकारी दिए।

मोटरसाइकल चालक गङ्गाराम डाँगी घाइते भएको प्रहरी बताएको छ। घाइते चालकलाई थप उपचारका लागि जिल्लाबाहिर पठाइएको छ। शव परीक्षणका लागि जिल्ला अस्पताल लगिएको प्रहरीले जानकारी दिएको छ।