जनकपुरधाम । सरकारले रेल्वे कम्पनी लिमिटेडको महाप्रवन्धकमा नेकपा एमाले समाजवादी (नेता माधव नेपाल पक्ष)का नेता निरञ्जन झालाई नियुक्त गरेको हो।

बिहीबार बसेको मन्त्रिपरिषद बैठकले सप्तरीको सदरमुकाम राजविराज नगरपालिका वडा नम्बर १ निवासी झालाई नेपाल रेल्वे कम्पनी लिमिटेडको महाप्रवन्धक पदमा नियुक्त गरेको हो ।

यसअघि केपी शर्मा ओली नेतृत्वको सरकारले नियुक्त गरेका महाप्रबन्धक गुरु भट्टराईलाई अहिलेको सरकारले स्पष्टीकरण सोधेपछि उनले स्पष्टीकरण नदिई राजीनामा दिएका थिए । त्यसपछि नयाँ महाप्रबन्धक नियुक्तीका लागि बाटो खुलेको थियो ।

महाप्रबन्धकमा झाको नियुक्तिसँगै नेपाली कांग्रेसका सभापति शेरबहादुर देउवा नेतृत्वको सरकार गठनमा निर्णायक भूमिका खेलेको माधवकुमार नेपाल पक्षले धमाधम राजनीतिक नियुक्ति पाउन थालेको छ ।

यस्तै, सरकारले बिहीबार बागमती प्रदेशको प्रदेश प्रमुख विष्णुप्रसाद प्रसाईंलाई हटाएर माधव नेपालको सचिवालयमा लामो समय काम गरेका यादव शर्मालाई नियुक्त गरेको छ।