काठमाडाैं । चीनबाट सरकारले खरिद गरेकाे आठ लाख मात्रा भेरोसेल खोप काठमाडौं आइपुगेको छ ।

स्वास्थ्य मन्त्रालयका प्रवक्ता डा कृष्णप्रसाद पौडेलका अनुसार नेपाल वायु सेवा निगमको वाइडबडी विमानमार्फत गएराति आठ लाख डोज खोप नेपाल आइपुगेको हो।

‘१६ लाख मात्रा खरिद गरिएको खोपमध्ये आठ लाख मात्रा पहिलो चरणमा आइपुगेको हो, प्रवक्ता पौडेलले भने’, ‘बाँकी थप आठ लाख डोज आज साँझ आइपुग्छ।’

यस्तै अगामी शनिबार पनि जापानबाट अनुदानमा छ लाख मात्रा एस्ट्राजेनिका खोप आउने उनले जानकारी दिए। प्राप्त भएको खोप प्राथमिकताका आधारमा लगाइने मन्त्रालयले जनाएको छ।

अहिलेसम्म नेपालमा एक करोड १६ लाख खोप प्राप्त भइसकेको स्वास्थ्य मन्त्रालयले जनाएको छ।