रामनारायण यादव/ सप्तरी । सप्तरीमा नेपाली सेनाको वनटन गाडी र पिकअप भ्यान एक आपसमा ठोक्किँदा पिकअप भ्यान चालकको मृत्यु भएको छ। सोही दुर्घटनामा दुई जना घाइते भएका छन्।

बुधबार दिउँसो पूर्व–पश्चिम राजमार्ग अन्तर्गत सप्तरीको हनुमाननगर कंकालिनी नगरपालिका वडा नम्वर १ भारदहको कंकालिनी मन्दिर नजिक पूर्वबाट पश्चिमतर्फ आउँदै गरेको १८ नम्बर बाहिनी गाईघाटको प्रदेश ३–०१–००१ ग ३७२५ नम्बरको नेपाली सेनाको वनटन गाडी र विपरीत दिशाबाट जाँदै गरेको मे १ च ६९२५ नम्बरको पिकअप गाडी एक आपसमा ठोक्किँदा दुर्घटना भएको प्रहरीले जनाएको छ।

दुर्घटनामा पिकअप भ्यानका चालक झापा जिल्लाको दमक बस्ने ४२ वर्षीय मेघराज शर्माको घटनास्थलमै मृत्यु भएको जिल्ला प्रहरी कार्यालय सप्तरीका प्रवक्ता माधवप्रसाद काफ्लेले जानकारी दिए।

दुर्घटनामा पिकअप भ्यानका सहचालक सुनसरीको इटहरी उपमहानगरपालिका वडा नम्वर ५ का ५२ वर्षीय भवानी र सेनाको गाडीमा सवार खोटाङको मझुवागढी नगरपालिका वडा नम्वर १० का १८ नम्बर बाहिनी गाईघाटमा कार्यरत नेपाली सेनाका जमदार जीवन गिरी घाइते भएका छन्। उनीहरूको स्थानीय अस्पतालमा उपचार भइरहेको प्रहरीले जनाएको छ।

दुर्घटनामा परेका दुवै गाडी र सेनाको वनटन गाडीका चालकलाई नियन्त्रणमा लिएर थप अनुसन्धान गरिरहेको जिल्ला प्रहरी कार्यालय सप्तरीले जनाएको छ।