काठमाडौं । सर्वोच्च अदालतले जनता समाजवादी पार्टी (जसपा)का अध्यक्ष महन्थ ठाकुरले दिएको रिटमा अन्तरिम आदेश दिन अस्वीकार गरेको छ ।

आज न्यायाधीश कुमार रेग्मीको इजलासले निर्वाचन आयोगको निर्णयको सक्कल प्रति समेत मगाउदै यस विषयमा दुबै पक्षलाई छलफलका लागि साउन १५ गते बोलाएको छ ।

यसअघि आयोगले जसपाको आधिकारिकतासम्बन्धी विवादमा साउन ११ गते सबै कार्यकारिणी समिति सदस्यलाई उपस्थित हुन आदेश दिएपछि आयोगको उक्त निर्णयविरुद्ध अध्यक्ष ठाकुरले सर्वोच्चमा रिट दिएका थिए ।

‘निर्वाचन आयोगजस्तो संवैधानिक अंगले खुल्ला इजलासमा बहस पैरवी छलफलसमेत गराई गरेको निर्णयलाई रिट निवेदकको माग बमोजिम तत्काल अन्तरिम आदेशबाट कार्यान्वयन हुन रोक्नका लागि निर्णयकर्ता र विवादको अर्को पक्षसमेतलाई छलफलमा राखी उक्त निर्णयमा apparent error of law छ वा छैन ? रिट निवेदकलाई उक्त निणएयले अपुरणीय क्षति पुगेको छ छैन भन्ने सम्बन्धमा निर्णय हुनु संवैधानिक मर्यादासमेतको दृष्टिकोणले उपयुक्त हुने देखिएको’ भन्दै दुबै पक्षलाई छलफलका लागि बोलाएको सर्वोच्च जनाएको छ।