काठमाडौँ । पहिरो गएपछि चितवनको नारायणघाट मुग्लिङ सडक खण्ड फेरि अवरुद्ध भएको छ । चारकिलो र पाँचकिलोमा पहिरो खसेकाले आज बिहानैदेखि सडक खण्ड बन्द भएको प्रहरीले जनाएको छ ।

बाढी र पहिरोका कारण देशभरका १४ सडक खण्ड बन्द भएको सडक विभागले जनाएको छ । ४९ सडक खण्ड एकतर्फी रुपमा सञ्चालन भइरहेका छन् ।

डोजर लगाएर पहिरो हटाउने काम भइरहेको छ । तर, सडकमाथिबाट ढुङ्गा खसिरहेकाले जोखिम बढेको भन्दै प्रहरीले अत्यावश्यक काम नपरि यात्रा नगर्न आग्रह गर्दै आएको छ । यस्तै पहिरोका कारण मकवानपुरबाट भीमफेदी कुलेखानी हुँदै काठमाण्डौ आउने सडक पनि बन्द भएको छ ।

यस्तै ठोरी–भरतपुर–मुग्लिङ आबुखैरेनी–गोरखा–घयाम्पेसा र आरुघाट– सिर्दिवास–रोइला भञ्ज्याङ सडक खण्ड पनि खुलेको छैन । यस्तै मनाङको डुम्रे बेसीसहर चामे सडक खण्ड पनि ठाउँ ठाउँमा बन्द छ ।

मनाङको तिमाङखोला, धारापानी, बगरछाप, रामबजार, अर्खले र च्याम्चेमा कतै पहिरो त कतै कटानका कारण सडकमा नोक्सानी पुगेको छ । यो सडक खण्ड खुल्न समय लाग्ने सडक विभागले जनाएको छ । यस्तै, अरनिको राजमार्ग अन्तर्गत पर्ने खाडीचौर(कोदारी सडक खण्ड पनि अझै सञ्चालनमा आउन सकेको छैन ।