काडमाडौं । नेपाली कांग्रेसका नेताहरुलाई आसन्न १४औँ महाधिवेशनका लागि नेताहरुले दौडधुप थालेका छन् ।

आउँदो भदौ १६ देखि १९ गतेसम्म काठमाडौंमा कांग्रेसको १४औँ महाधिवेशन हुने कार्यतालिका सार्वजनिक भएसँगै कार्यकर्ताहरु पनि आफ्नो उम्मेदवारलाई जिताउने गरी सक्रिय बन्न थालेका छन् । यद्यपि हालसम्म औपचारिक रुपमा उम्मेदवारी घोषणा भइसकेको छ ।

सभापतिमा शेरबहादुर देउवा, विमलेन्द्र निधि, रामचन्द्र पौडेल, कृष्ण सिटौला, शशांक कोइराला, प्रकाशमान सिंह, शेखर कोइराला र कल्याण गुरुङलगायतको नाम चर्चामा आइरहेको छ ।

तर, ती मध्ये निधि, शशांक र सिंहबीच देउवाको विकल्पमा नेतृत्वको विषयलाई लिएर सोमबार लन्च मिटिङ भएको छ । आफ्नो वैवाहिक वर्षगाँठको अवसरमा ‘लन्च’ का लागि निधिले शशांक र सिंहलाई  मध्यबानेश्वरस्थित आफ्नो निवासमा बोलाएर मिटिङ गरेका हुन् ।

सोक्रममा उनीहरुबीच पारिवारिकसहित पार्टीको महाधिवेशन र नेतृत्वको विषयमा कुराकानी भएको छ । ३० वर्ष देखि निधि देउवाको सहयात्री नेताको रुपमा चिनिँदै आएका छन् । निधिले आसन्न महाधिवेशनमा सभापति पदमा उम्मेदवारी दिने तयारी गरेका छन् । उनले शशांक र सिंहलाई आफूलाई सघाउन आग्रह गरेका छन् ।

तर, शशांक र सिंहले पनि आफ्नो दाबेदारी पेस गरेका छन्  । शशांकले नेतृत्वमा परिवर्तन ल्याउनै पर्ने भएकोले वरिष्ठ नेता रामचन्द्र पौडेलसहित पार्टीका सिनियर नेताहरूसँग छलफल गरेर अघि बढ्ने बताए ।

यता सिंहले पनि सभापतिमा आफूलाई सहयोग गर्न निधि र शशांकसँग आग्रह गरे । सोक्रममा शशांक र सिंहले देउवाको विकल्प खोज्नुपर्नेमा जोड दिँदा निधिले देउवाबाट पनि सद्भाव प्राप्त गर्न सकिने बताएका छन् ।