सिन्धुपाल्चोक । सिन्धुपाल्चोकको हेलम्बु गाउँपालिकामा बाढीबाट १५० परिवार विस्थापित भएका छन् । बाढीका कारण २३ जना बेपत्ता छन् ।

हेलम्बु गाउँपालिकाले सार्वजनिक गरेको तथ्यांक अनुसार बेपत्ता हुनेमा मेलम्ची खानेपानी आयोजनामा कार्यरत तीन भारतीय र तीन चिनियाँ नागरिक समेत छन् । गाउँपालिकाले बेपत्ता हुनेको संख्या बढ्न सक्ने जनाएको छ ।

हेलम्बु गाउँपालिका १ सेमेसिदाङ हिमालमुनि रहेको भेमाथाङ चौरमा गएको पहिरोले खोला थुनिएको थियो । पछि थुनिएको खोला फुटेपछि बाढी आएको हो । गाउँपालिका भित्र चार मोटरेबल पुल र ६ झोलुङ्गे पुल पनि बाढीले बगाएको छ ।

यस्तै करीब ८ किलोमिटर सडक बगाएको गाउँपालिकाले जनाएको छ । बाढीबाट हेलम्बु गाउँपालिकाको १ सबैभन्दा बढी प्रभावित छ । एक सयभन्दा बढी घर टहरा बाढीले बगाएको छ ।